倪晨曦日前同班fans預祝聖誕節，開大食會又搞抽獎之餘，今年因合作真人騷《全職媽媽放大假》而相識嘅兩個仔女睿睿、千千，都有一齊慶祝！佢話：「聖誕節係我最喜鍾意嘅節日，所以特別揀呢個節日同fans聚會。上年都有搞，仲準備晒所有人嘅禮物。最開心嘅係，由上年大約20個fans，到今年有差唔多50個fans，其實我鍾意送禮物畀人多過收禮物，因為準備禮物，為大家挑選，到最後由邊個抽到嘅過程，我都好享受。」

講到最難忘嘅聖誕節，原來係佢細個時移民到加拿大過嘅第一個聖誕節，佢話：「喺加拿大，聖誕節會落雪，周圍有好多燈飾，仲記得當時買咗棵聖誕樹返屋企，一家人一齊佈置，會掛相，同寫低一件難忘嘅事掛上樹，我覺得好有家庭溫暖。今年終於有自己工作室，即刻買咗棵聖誕樹嚟佈置，真係好享受裝飾呢個過程。」

至於有份出席嘅睿睿、千千，佢話事前完全唔知，所以好驚喜：「見到佢哋嚟到時，覺得好surprise，其實節目完咗之後，我哋都有keep住聯絡，不過今次佢哋係睇instagram知道有呢個party，就私底下同我嘅同事聯絡，想畀驚喜我，仲送咗份自製嘅禮物畀我，係一個透明盒，入面有我同佢哋嘅相同燈泡，好靚好感動！」

更多娛聞，喺晒《娛果》
http://fb.com/appledailyent