星期日上演嘅荷甲聯賽，鹿特丹斯巴達作客以0:1輸咗畀海牙，但守門員哥斯米特喺下半場6秒鐘之內成功連環撲救4次嘅表現就贏盡讚賞。

呢場荷甲兩隊半場踢成0:0，換邊之後，海牙喺50分鐘憑住艾卡耶迪嘅入波而領先1:0，4分鐘之後海牙幾乎可以增添紀錄，不過哥斯米特表現神勇，6秒鐘之內連環救出法堅貝治嘅射門同補射，撲出比安莊臣射門省中科蘭尼斯彈埋龍門嘅一球，仲有比安莊臣跟住嘅頭槌攻門，認真犀利。

其實哥斯米特都唔係第一次有好表現，上一輪鹿特丹斯巴達雖然喺主場以0:2輸畀阿爾克馬爾，但喺上半場兩隊未有紀錄嘅時候，哥斯米特就曾經兩度救出12碼。當時阿爾克馬爾嘅韋格賀斯主射12碼，佢地波射龍門嘅左下角畀哥斯米特成功撲出，之後球證話要重射，韋格賀斯射去另一邊畀哥斯米特再一次撲出，25歲嘅荷蘭門將哥斯米特似乎有啲料到。