當年今日
關於我們

出完新書熱刺狂瀉 普帥本自傳唔吉利?

蘋果日報 2017/12/01 03:00

熱刺李斯特城自傳普捷天奴英國足球

熱刺最近狂失分,外界有指最巧合係領隊普捷天奴出完佢本新書後,因入面有講到熱刺近年成功嘅秘訣同埋一啲將帥出現過爭拗嘅問題,所以影響咗士氣同穩定性。普帥聽完後就一笑置之,仲多謝傳媒幫佢谷新書。
國際賽期後,熱刺已經三場聯賽冇贏過,周中作客1:2輸埋畀李斯特城後,已經跌落第七,落後榜首曼城多達16分,今季爭標凍過水。有傳媒就怪到普捷天奴上月出咗本由人哋講述佢一生、叫「Brave New World」嘅半自傳,話因為本書公開咗熱刺內部情況,包括佢曾經同艾歷迪亞有爭執等,球隊自此成績就開始下滑,但普帥就覺得呢個指責好無稽。
「當本書啱啱面世嗰陣,我哋贏完利物浦又贏皇家馬德里,點解嗰陣時唔提?我其實想多謝寫呢隻故仔嘅記者,幫我促銷本書,等更多人知道,咁樣賺嘅錢會多,而收益就會捐落慈善機構,幫助到更多有需要嘅人。」
普帥亦認為書入面啲內容根本冇問題:「又唔係唔見得光嘅事,我亦冇講大話,甚至我好鍾意分享呢啲事,有好多仲係好資訊性,等更多人可以知道我哋嘅故仔。」
----------
係你!打造星級球隊,征服各地聯賽!立即加入『BFB CHAMPIONS 2.0』!
http://bit.ly/2xrTKGM