【專家提醒】
拍賣行經常驚現平市價單位，由五折樓至九折樓都曾出現，然而往往存在缺陷，包括凶宅、半契樓、無契樓、未交吉單位等，建議準買家事前做定功課。
環亞物業拍賣董事總經理曾傑俊表示，市民經常以為拍賣行有筍貨執，好多人又覺得銀主盤會平，其實銀主盤開始唔會平賣，以市價放售，只不過經過三、四個月，單位賣唔出，或有缺陷，陸續減價，減幅達到15%，「一定是有啲隱憂，啲人睇完係唔鍾意嘅」，所以銀行被迫低價成交。

或拍賣凶宅及無契樓

其他問題包括凶宅、無契樓及未交吉單位，分別較市價打七折、八折及九折。較市價折讓最多單位為半契樓，曾見低過半價出售，如某單位半份業權持有人被財務公司追債，被迫拍賣套現，對於新買家而言，「這半份契冇用，要同另一半業權持有人傾偈，究竟收租、買埋半份或賣埋半份業權？凶宅買咗都叫有得住，呢啲買咗隨時冇得住。」
至於拍賣物業開價往往訂得比市價勁平，曾傑俊不諱言，開價是拍賣行的宣傳手法。他舉例：「若單位市價500萬，業主點會畀拍賣行以430萬賣……其實客人睇完樓，做完估價，如估足500萬，都唔會覺得業主用430萬賣，但有機會賣平少少，如最終賣平二、三十萬，買家開心，而業主立場係市場放盤好耐，都冇人還價500萬，今日有470、480萬，起碼叫鬆一口氣。拍賣場係畀買賣雙方多一個渠道交易。」