從山腳爬到山頂，沿路也是街坊對這小山的愛，自製的健身架和乒乓波枱、用作清掃樓梯落葉的掃帚、泥土暗斜上的防滑麻布。這座小山因發現逾百年歷史蓄水池，頓時聲名大噪。在主教山做運動十多年的芳姐，是首批發現山頂暗藏古建築的街坊，因被其宏偉撼動，急召百名街坊趕在昨早阻止動工，更隻身衝前煞停鑽土機：「我淨係想保護佢！」

「我新買個呼拉圈仲喺入面啊」，有街坊得知山頂被封，不禁嘆說。比起同區的「嘉頓山」，主教山向來不是打卡熱點，卻是區內街坊的聚腳地。由巴域街山腳上山，先是迎來鐵製韆鞦和各式健身架，在健身架旁搭建的竹枝，或樹木之間則綁有鐵線製的掛鈎，讓街坊做運動時可掛上背囊和外套，還掛上告示提醒街坊「適量運動」。

沿石梯拾級而上，乒乓聲音響遍小山，山邊「每層」也有乒乓波枱，周圍放有膠椅，是街坊們的小擂台；竹枝搭建的小涼亭，更有街坊親自清掃落葉。走到泥土鬆散和斜坡時，地面就鋪有麻布防滑。路邊的石椅歪歪斜斜，各有不同磚款，也似是街坊「傑作」。往棠蔭街方向下山，則有一個「同心徑」路牌，有街坊說這路牌已很多年，「方便大家上落」。

「我哋係真心愛呢個地方」，在主教山運動十多年的太子居民芳姐說，山上的乒乓波枱和「同心徑」等是一班義工街坊集資，多年來累積回來，街坊們對主教山有深厚感情，「成班街坊一家人咁，所以個地方要填平係好唔捨得」。

芳姐指，前日（27日）趁假期就走到配水庫頂，竟發現該處已挖出大洞，內裏暗藏龐然建築，深怕一切美麗舊年華，明日同步拆下，「當時見到，嘩！啲柱好靚喎！仲有幾條，之後就落去睇同影相，仲發畀朋友叫佢哋過嚟，係最後打卡時間，見證歷史，聽日不再㗎喇。我一路感受好心痛、好不捨，真係流眼淚」。

芳姐續指，落山之後突然冒出念頭，「呢度我要保護佢」，於是聯絡一眾街坊翌日一早上山，趕在工人動工前抗議，「有街坊罵我黐線嘅，政府要拆嘅嘢就要拆㗎啦，咁多事。我答唔到佢，我就係心痛」。

她指，當時有街坊帶同「保護歷史」的標語到場，但工人無視眾人抗議，繼續發動鑽挖機，無計可施下只好走去阻止，「我唔理，就企喺度，好大塵，心入面（諗）好彩戴咗口罩，你咪整囉，死我都唔驚，我只係想保護佢。跟住佢部機喺度『登登登』，我就走去阻住佢個機，我今日就係同佢（決）生死」，成功迫使工人停工。及後區議員和傳媒等關注事件，地盤至今暫未開工。

芳姐指，甫入遺蹟時已被其宏偉震懾，形容內裏有如皇宮，「好壯觀好靚！百幾年嘅石頭，一個個麻石完整如初，有啲街坊話似去咗金字塔、羅馬尼亞嗰種feel」，好景不會每日常在，雖然現時有部份遺蹟被工人打爛，「唔知好唔好，但唔打爛個窿唔知入面咁靚」。

她說，如不及時阻止工程，「古羅馬式」建築就「冇咗」，斥政府做事官僚，「個個都唔清楚狀況」，認為既然當年政府進行工程是為填平配水庫讓街坊玩，發現如此具價值的建築，希望可完整保留和保育，讓人打卡和參觀，讓小朋友見證歷史。

上周日凌晨發文公開主教山配水庫的Facecook專頁「香港探古」負責人、保育建築師Nicky Wong接受《蘋果》訪問，他表示帖文內容是由其朋友、行山愛好者Vincent所提供，最初看到照片時已十分驚嘆，他認為整個配水庫的設計巧思，位處山上可增加水壓為九龍各區長途輸送水，以確保各區水壓統一，「羅馬式」拱門及其迴廊設計更十分罕見。

Nicky認為，水務署在動工前應先研究配水庫歷史，「唔係咁草率就提交俾區議會」，古蹟辦更無事前實地碪察，「開工之前應該做好啲study」，他認為可修復結構安全，甚或參考外國先例，將該處活化為一處休憩用地，免費開放予市民。

Vincent接受《蘋果》訪問時表示，從未想過照片會引起如此大的迴響，他周日到訪主教山已有不少街坊在該處休憩，「佢哋都好維護呢個地方」，他認為香港現時的教育已很少提及殖民地時期的歷史，因此更應保育配水庫，讓下一代香港人了解香港過去的歷史，「呢個教育係好應該」。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！