有人話肥佬黎得罪人多喎,但記得以前《蘋果》都有唔少樓盤廣告㗎,𠵱家點解到咗樓市轉角,形勢大好之時,《蘋果》反而一個樓盤廣告都冇?左丁山只係睇到現象而覺得奇怪啫,完全唔知道內裏原因。唔通,香港地產界落咗一道封殺令?木宰羊。繼續係咁落去嘅話,黎老闆怎麼辦?
講起「君臨天下」,莫講話左丁山冇錢買,就算買得起,都唔敢住。自己個頭好細,唔敢戴咁大頂帽,假若有人問:你住響邊?答:君臨天下。嘩,雖是實情,口氣太大啫,做人都係謙啲好,如果你話住響寶翠園、世紀大廈、玫瑰花園,人家隻耳仔聽得好舒服,「君臨天下」喎,你係皇帝咩。呢間大厦英文叫TheHarbourside正好名副其實,意思與「君臨天下」差得太遠咯。