52歲台灣導演戴立忍，同細17歲嘅台灣女星桂綸鎂，傳出14年情玩完，而今日桂綸鎂喺台灣出席活動時，一聽到戴立忍個名，只話︰「不方便回答。」再被問到感情狀況時，桂綸感只以「謝謝」來回應。

一直以來都關注社會議題嘅戴立忍，兩年前被大陸標籤為「台獨藝人」後，封殺至今。而近日，就傳出佢買咗一艘價值逾2,000萬台幣（約港幣510萬）嘅帆船，隱居喺宜蘭烏石港，台灣《蘋果》噚日走訪該處，就喺烏石港內嘅遊艇停泊區，捕打大赤膊着短褲獲戴立忍，同埋佢艘「戴之船」，只見依家嘅戴立忍曬得皮膚黝黑，精神唔錯，仲有個肚腩仔，自駕救生艇巡船，動作相當熟練，遊艇生活似乎過得唔錯。

至於佢艘「戴之船」外型霸氣，設計新穎。據了解，戴立忍以船為家已有半年以上，平日佢鍾意留喺船尾，仲會趁日落前會出海睇日落，而當地居民似乎都知道嚟咗一位導演同佢哋做鄰居。

之後，見戴文忍同一名疑似係船商嘅男子傾談，只見佢表情認真，不時指手劃腳，之後就好敏捷咁攀爬去自己船嘅甲板上，帶住該男子喺船上從頭到尾巡視，仲開埋引擎測試。不過，戴立忍似乎未滿意，索性上埋船尾嘅小型救生艇，駛去船頭處指住船身，示意叫對方查看，而佢嘅操艇技術，睇嚟相當熟練，巡完船身後，一行人就番入船艙開會。

過咗一陣，船商同戴立忍嘅朋友都先後離開，至於戴立忍則一個人繼續喺船上享受悠閒。《台蘋》記者致電戴立忍，問佢係咪喺船上休養生息搵靈感？佢沉默一陣，然後好客氣地話：「不聊這些啦，我現在在忙，不好意思不多說了。」

精選娛聞，喺晒《娛果》
http://fb.com/appledailyent