日本女子組合Babyraids Japan近日首度來港，參與今日起一連兩日假九展舉行嘅音樂會「@ JAM×TALE in Hong Kong 2018」，吉川友、東京女子流及香港女團Ariel Project等都會輪流登場。

Babyraids Japan所屬嘅LesPros事務所捧紅過唔少當紅女星，同門師姐新垣結衣更被封為「國民老婆」走紅亞洲各地。Babyraids Japan接受《蘋果》專訪，五位成員都係首次到香港，高見奈央笑言一到香港就發現麥當勞有日本食唔到嘅新menu，包括夾有菠蘿嘅蝦堡，五人提起美食即議論紛紛，高見奈央表示：「好想飲珍珠奶茶，日本女生都十分喜歡的。」年紀最輕嘅渡邊璃生於日前度過18歲牛一，佢來港前搵過資料知道有幻彩詠香江，所以好想去維港欣賞夜景，五位成員今次更學定簡單廣東話，例如「好好食」、「多謝」、「你好」、「早抖」等，相信可在台上大派用場。

擔任主音嘅林愛夏最近同香港歌手吳業坤合作，佢對吳業坤印象感覺相當親切，指坤哥有點怕醜，形容對方似日本嘅草食男，不過雙方合作卻一拍即合，唔止用雙語演繹陳奕迅翻唱玉置浩二嘅《Mr. LONELY》，身為日本人嘅林愛夏仲專登學廣東話同坤哥合唱《原來只因深愛著》，問到林愛夏為呢首歌學咗幾耐廣東話？佢話：「錄音前用了一星期去學發音，聽完原裝版再用拼音方便自己唱這首歌。」佢話事前都有了解呢首歌嘅歌詞內容，知道係JW同坤哥兩首歌曲嘅延續，非常有故事性，仲笑言係首分手歌，坤哥都有提佢唔好唱得咁甜蜜。除咗坤哥，林愛夏原來仲識大埔LuLu（董嘉儀），佢透露：「我識Lulu，之前她在Instagram上follow我，大家都有在網上交流，更談到半夜，我們約定今次要見面。」

Babyraids Japan自2012年組成至今已出道5年，當時要在兩年內武道館開騷才逃過解散危機，問到大家感情如何？大矢梨華子笑言大家可能會覺得佢哋關係麻麻，但就補充說：「我們捱過好多試煉，雖然不知道是否稱得上感情好深厚，但大家私下也會一同食飯，更會五人一齊到迪士尼樂園。」繼進軍武道館開騷後，傳谷英里香表示希望能以日本代表到各地交流，今次能到香港都非常開心，望日後可以有更加多新挑戰。

《原來只因深愛著》 吳業坤 X 林愛夏 @ BABYRAIDS ─ link
https://www.youtube.com/watch?v=_wb-V11_Pw8&feature=youtu.be

精選娛聞，喺晒《娛果》
http://fb.com/appledailyent