當年今日
關於我們

【李八方Online】跨境巴士CEO食誠實豆沙包:高鐵只去到廣州南

蘋果日報 2018/09/12 16:29

高鐵陳帆一地兩檢西九站

高鐵今個月23號通車,不過早前港鐵已經公佈,首班去廣州南嘅班次似乎「滯銷」,賣出一半都唔夠。難怪有咁多位可以邀請一眾立法會議員齊齊遊高鐵河,即日來回廣州南喇!適逢今日上市跨境巴士集團冠忠巴士搞記者會,一眾傳媒行家自然關注高鐵會唔會對跨境巴士客流量有影響喇!不過集團附屬公司中港通董事總經理陳宗彝唔知係食咗「誠實豆沙包」,定係「鬼拍後尾枕」,居然話高鐵西九站幾乎影響唔到集團喺廣州嘅業務,因為高鐵只係去到「廣州南」,即係番禺一帶,但佢地集團喺廣州嘅跨境巴士總站,就落正喺廣州市中心嘅廣州東站,所以高鐵攤分唔到佢地喺廣州市嘅乘客。
陳總仲話,想喺廣州南入廣州市中心,要搭站站停嘅地鐵,分分鐘要用多成個鐘;而直通巴士嘅票價又只係高鐵票價四成,所以認為高鐵開通之後都威脅唔到佢地嘅生意,最多只會分薄佢地喺鄰近廣州南城市例如番禺線嘅生意。不過陳總都好識講嘢,佢話西九站同圓方嘅跨境巴士總站只有「百步之遙」,相信未來雙方可以有協同效應,佢又話高鐵係方便商務人士「用錢買時間」,同跨境巴士嘅市場係唔同咁話喎。陳總咁識講嘢,不如叫中央畀你哋整條巴士線幫高鐵客由廣州南直入廣州市中心喇!