近幾個月多隊韓國組合先後搶閘來港，提早同香港粉絲過聖誕節慶祝。而上月，男團B1A4嘅同門師妹團OHMYGIRL（OMG）亦首度來港，仲受本報訪問。

平均年齡只得19歲嘅OMG由HyoJung、JinE、Mimi、YooA、SeungHee、JiHo、Binnie及Arin8位成員組成，以「想成為各位心中嘅MyGirl」而將組合命名為OHMYGIRL，仲話視韓流一姐團少女時代為目標，想好似對方咁喺全球發光發亮。

對於第一次嚟香港，OMG都表現得好興奮，仲講極唔停，話想去夜市、星光大道睇下之外，亦恨食點心、雲吞麵同蛋撻。而8女亦非常鍾情香港巨星話：「我哋自小就識得香港巨星如劉德華、周潤發、張國榮等，如果可以同佢哋見面就好。」而提到過去好多韓星來港開騷都會特登為香港粉絲準備廣東歌，OMG都話如果第時有機會喺香港開騷，都會想用廣東話挑戰偶像張國榮嘅歌曲，仲話：「O依家只係諗下都覺得好緊張，佢真係好有型。」

適逢聖誕節，OMG就話今年係佢哋第一次一齊過聖誕，所以都好期待，講到聖誕願望，成員Binnie就話：「我希望可以出一首屬於我哋OHMYGIRL嘅聖誕歌，大家聽完會覺得好幸福，感覺好有意義。」其他成員聽到之後都拍手同意。而隊長HyoJung仲話嚟香港之前已經做晒research，知道香港曲奇餅好出名，所以會買嚟作為聖誕禮物送畀屋企人。

O依家有好多事務所為咗保護藝人形象都會採取「戀愛禁令」，但OMG對於禁令就冇覺得可惜，仲好乖咁話：「每間公司都有規條，組合會好好遵守。」不過一講到男仔、理想型，8女都表現興奮，仲逐一講出理想型，當中有遠見嘅男仔最得大部份成員歡心。

對於2016新計劃，OMG就揚言想向綜藝節目挑戰，仲話想演出人氣節目《RunningMan》。