敏妮入院前認購賽晶（580），咁啱經紀H放假去日本，冇人提醒敏妮抽唔抽到。出院後，發現原來抽到一手，見隻股似乎「唔熟水性」，應該唔曉「潛水」，所以睇定先食。隻股果然長升長有，可惜大陸突然加息，打亂敏妮陣腳，加息翌日開市即沽，結果賺少咗。
講開新股，家陣未到逢抽必贏地步，但唔少散戶寧濫勿缺。敏妮孤寒，唔想輸惟有做功課，搵咗今個月首日掛牌即穿招股價嘅融創（1918）、海豐（1308）、鐵江現貨（1029）、新天綠色（956）、永暉（1733）、麗悅（2266），睇吓有冇樣睇。

可留意賬簿管理人

其中跌得最甘係麗悅，首日跌14.55%，雖然有四叔同彤叔認購，但有幾樣嘢一睇就知具備「潛水員」特質，包括申請一手中籤率100%，近下限定價。搶手貨點會抽一手都畀你咁筍，就算畀你都唔會平，點會下限定價。
隻海豐同樣抽一手中籤率100%，下限定價。鐵江現貨仲唔足額認購，又係下限定價，唔使資深投資者都知博唔過。
問題係，認購之前，中籤率、定價都未出，股王A就教敏妮睇吓邊個係「賬簿管理人」。賬簿管理人係負責經辦發行嗰個，職責由做documents到製訂促銷計劃，參與確定發行規模，甚至定價同啲貨點分配。如果賬簿管理人往績好，證明湊新股有一手，跟得過。
敏妮都試過統計佢哋嘅往績，發現唔會有長勝將軍，亦冇永遠「黑仔」，如果有，佢應該冇得撈。咁惟有睇吓嗰排邊個「黑仔」，盡量避。上面6隻股，摩根士丹利分別係新天綠色同麗悅嘅賬簿管理人，德意志都有兩隻，分別係融創同永暉。
不過，大摩同德意志近期分別憑華地（1700）同賽晶洗咗啲黑氣。淨番仲有幫鐵江現貨同永暉嘅美銀，到底幾時先轉運呢？

溫敏妮
http://wanmanli.com/blogs/