【紅軍封王】憶述「伊斯坦堡之夜」睇到完場 阿一：可以同曼迷爸爸講贏咗歐聯
蘋果日報 2020/06/26 20:30
英超利物浦紅軍阿一紅軍封王
利物浦球迷今季的心情，肯定有如坐過山車，長居聯賽榜首，優勢極大之，卻遇上武漢肺炎。球迷阿一自90年代起追捧紅軍，雖習慣失望，但球賽停擺之際，亦坦言心情跌落谷底，幸聯賽冠軍終於到手。
阿一喜歡利物浦的理由很簡單，「爸爸係曼迷，咁我反叛，鍾意佢相反嘅，自然就揀利物浦，咁就廿幾年。」當時球隊最受歡迎的是麥馬拿文及列納，他獨愛主力射手「神」科拿，「當時踢得悅目囉，踢得好睇但贏唔到咩冠軍。」
一季又一季，利迷好像都已習慣失望，阿一說：「咁多季，每次都係開季時希望贏到隻盃、贏到聯賽，季中就變成希望贏隻盃仔，去到三、四月就變例行公事，期待球會買咩人，下季重振雄風。」
他認為，奧雲時期為球會帶來希望，但奧雲離開了，才出現經典的「伊斯坦堡之夜」，阿一當然記得那一晚，「同好多球迷一樣，我嗰晚喺屋企睇亞視，半場好令人沮喪，我個曼聯爸爸半夜起身同我講『3:0就瞓啦』，但我當然睇埋，最後完場即刻換衫返工，仲可以同我爸爸講聲，我哋贏咗歐聯。」
經典的還有上屆歐聯，利物浦作客巴塞隆拿時，阿一剛好在「朝聖」，看畢對哈德斯菲爾德的比賽，「我嗰日喺晏菲路酒吧睇直播，成個場都係利迷，中間有三個著巴塞波衫，唔知係巴迷定愛華頓迷搞事喇。不過之後都畀場波搞到冇心情理，只寄望返主場贏4:0反吸，點知真係發生咗。」
本來去年已「朝聖」，今年沒有打算再去利物浦，卻眼見首個英超冠軍幾可肯定到手，幾經爭扎後，在同為利迷的妻子支持下，終於決定再去利物浦，並高價倫入主場對般尼的門票，「計過數，都好肯定呢場已經係捧咗盃。」但計劃追不上轉變，一場疫症，全球大亂，「心情真係跌落谷底，冇諗過會一發不可收拾到咁。我有諗過球季腰斬，甚至成個球季唔計，嗰種心情唔係喊就夠。」現在冠軍到手，或許眼淚還是會流，不過是感動的眼淚。
他認為，奧雲時期為球會帶來希望，但奧雲離開了，才出現經典的「伊斯坦堡之夜」。
阿一自90年代起追捧紅軍，雖習慣失望，但球賽停擺之際，亦坦言心情跌落谷底，幸聯賽冠軍終於到手。