港股草草收爐，恒指微跌，個別細價股趁半日市冇乜成交做到好好睇睇埋年結，例如萬順昌（1001）成75萬股，彈升20%，收1.20元。
萬順昌有隻公司輪561跟住升，升幅51%，做咗是日輪王，9萬份成交。04年11月到期，輪價62仙，溢價50%，槓桿率1.9倍，溢價過高買唔過。要做嘢，始終要揀正股，不過公司剛啱派半年成績表，純利大降96%，又係買唔落手。
勵晶太平洋（575）成百幾萬股，彈升24%，收17.3仙。
勵晶升，帶起埋隻公司輪633，上日收1.9仙，有人掛2.6仙買入，咁就會按盤價急漲37%。買盤掛入1萬份，就算買到，都係只值兩嚿幾水，冇乜意義。
633明年中夠鐘，行使價2.80元，正股𠵱家連7%都唔到，隻輪好難有機會有得剩。

1704繼續陰落去
滙豐（005）跌50仙，滙豐認購輪1704散18%，成為是日跌得最勁嘅窩輪。今個月杪夠鐘，行使價98元，隻輪會繼續陰落去。