【馮仁昭四圍超】行超市傾生意
猷啟：做嘢好大壓力
蘋果日報 2017/04/12 00:00
賭王何鴻燊三房公子何猷啟雖然好投入同以色列索模Angelika嘅戀情，不過並唔係只掛住拍拖，冇心工作嘅富二代，相反佢好努力幫手打理家族生意，上年仲開始創業，同朋友合股推出手機遊戲。日前猷啟喺銅鑼灣city'super超市買嘢時，就一路推住購物車，一路講電話傾生意，全程唔係講電話就係撳電話，投入到完全冇留意過身邊嘅環境。
猷啟喺超市邊行邊傾電話，仲提起有關資金嘅問題。DV圖片
玩糖果玩具
當日戴住cap帽襯一身運動街坊裝嘅猷啟，撇低索模女友，一個人行入超市買嘢，見佢架購物車放咗幾盒粟米片、穀物類嘅健康食品，推住架購物車，漫無目的咁漫遊超市，邊行邊講電話，不停兜圈，仲對周遭環境冇乜防範，聽到佢向電話另一頭呻：「做嘢好大壓力！」又提及有關資金嘅問題，相信同生意有關。
之後猷啟又將電話駁上免提裝置，再行去糖果區，見到個伸縮裝嘅糖果玩具，仲玩咗一陣，童心未泯。大約半個鐘之後，佢就去排隊畀錢，一手拎住購物袋，另一隻手就係咁撳電話，全程耷低頭，到上扶手電梯，至發現佢個樣有啲愁。
撰文：馮仁昭
之後猷啟又將電話駁上免提裝置，再行去糖果區，見到個伸縮裝嘅糖果玩具，仲玩咗一陣，童心未泯。大約半個鐘之後，佢就去排隊畀錢，一手拎住購物袋，另一隻手就係咁撳電話，全程耷低頭，到上扶手電梯，至發現佢個樣有啲愁。
撰文：馮仁昭
猷啟見到伸縮裝嘅糖果玩具，拎上手玩咗一陣。