信心危機蔓延全球,連避險首選的領匯(823)都急插4.8%,可見投資者唔理好醜,總之有貨就掟,恐慌得很!恒指穿一穿萬七關就反彈,目的只係殺牛證,但要留意的是,現時最貼價熊證收回價係萬九點,挾倉殺熊證的誘因不大,預期短期反彈力度有限,起碼要等輪商出返啲貼價熊證再算。
大戶繼續掟貴價股,紙業股應係下一輪洗倉主力,維達(3331)剛跌穿長期上升軌,形勢急轉直下,有貨者要快掟!維達主要做紙巾,屬消費必需品,較具防守性,但當資金將周期股掟得七七八八,就會開始沽硬淨股,維達昨跌穿升軌,係重大利淡訊號,加上10日線接連跌穿20及50日線,基本上已經「死梗」,加埋MACD熊差距擴大,股價向6字頭進發已無懸念。
睇埋中期業績,更係敗象畢呈,營業額升31%,但純利跌3.7%,毛利率急跌4.3個百分點至27.7%,原料成本飛升加上缺電缺水持續,困擾業務表現,料下半年亦難以改善。花旗亦指行業競爭激烈,令維達難以加價,而尿片業務在未來1至2年未有盈利貢獻,令毛利率難以回升。維達昨收7.83元,跌6.9%,成交1278萬元。
魏力