嚐慣了無綫味精劇，好戲嘅林保怡主演的ViuTV開台劇《瑪嘉烈與大衛系列綠豆》，改編自網絡作家南方舞廳同名作品，有人熱捧尤如清泉的劇情，亦有人嫌棄太過平淡，對此，兼任編劇和監製的南方舞廳說：「其實戀愛就係好似水咁淡，有幾多高潮吖？最高潮就係佢唔愛你！所以《綠豆》最高潮係瑪嘉烈走咗。」能寫出細膩的愛情，是否愛情經驗很豐富？她說：「愛情經驗唔算好豐富，不過戀愛經驗就點都多多少少有嘅。」

劇集中，南方舞廳也有加插TVB「膠劇」煮麵和BBQ的場面，她笑說：「燒嘢食我有嘅，煮麵、煎蛋我都有嘅，咁你成個手法、你煮麵嘅理由，同埋BBQ傾偈個內容都唔同嘛，通常organic啲嘢唔受歡迎，啲人都鍾意食啲味精嘢。」

「如果《綠豆》喺TVB播？我驚拖冧佢(TVB)啲收視喎，如果TVB要拍就唔可以咁淡淡然囉，要加啲爭產呀，嗌多啲交囉，即係會一日到黑就嘭門呀、推嘢呀，我覺得佢(《綠豆》)會變到好多人睇囉。」

一個70後香港土生土長女性，當年因喜歡達明一派同名歌曲《南方舞廳》而起用歌名作筆名的南方舞廳，投身社會首份工作是在政府擔任繙譯員，不甘沉悶毅然轉職商台的廣告創作部，再先後於now及廣告公司任職，現為ViuTVcreativedirector(創作總監)。首次擔任劇集監製，南方舞廳表示：「監製其實我唔係好識做，係金廣誠先生『你做啦』，點呀？冇人頂我頂啦！好彩有佢出手，因為邊個識我啫，同埋好多人，你要佢識你，佢先會幫你。」

可曾想過在收視或口碑撼贏無綫？南方舞廳說：「口碑做咗啦《綠豆》，收視就冇可能贏到TVB，TVB閒閒地都廿幾點，ViuTV有排都追唔到，因為TVB嘅慣性收視實在係牢不可破。ViuTV係零收視開始，所以佢1點收視都覺得OK。」

《綠豆》後，南方舞廳任編劇的新處境劇《三一如三》將於本月25日推出，她特別叮囑觀眾不要將兩劇作比較：「千祈要話唔好睇，因為《三一如三》係完全另一種感覺，傾向比較生活化，冇金句，節奏快啲，會易入口啲、易消化啲。」


採訪：魯吉
影像：廖達燊、馮峰
攝影：仇志德
場地：洋紫荊維港遊