韓劇《感激時代》男星金賢重喺呢個星期，連日嚟同前女友A小姐就A小姐懷孕一事展開激烈嘅爭拗戰，金賢重一時又唔承認同A小姐復合，一時又話要對方驗肚先肯認做爸爸，一時又話擔心BB健康先會叫A小姐驗肚但對方多次拒絕驗肚，而A小姐由始至終都堅持話自己真係有BB，BB爸爸亦的確係金賢重，成件事混亂到暈。

正當大家都唔知邊個講真話，邊個講假話時，韓國傳媒Dispatch噚日就公開話自己同A小姐做咗個獨家專訪，仲公開晒佢兩個人嘅短訊對話。

喺公開短訊入面可見，金賢重由一開始就知道A小姐有咗BB，仲同對方承诺話：「為咗BB要更加努力咁生活，忘記過去重新開始，結婚之後要幸福咁生活。」

短訊內容，同金賢重之前同大家講話佢早就同A小姐斷絕聯絡嘅立場完全唔同，令人質疑金賢重講大話。對於金賢重早前嘅表現，A小姐直認非常失望。仲話唔會同金賢重結婚，會自己一個撫養BB，希望件事快啲完結。