日本央行加息後，市場認為央行「無料到」，於是乎繼續沽日圓，令圓滙屢試低位。圓滙低企又令到對沖基金更加放肆借低息日圓做CarryTrade，近日油價同金屬價格急升，應該同呢樣嘢有關。
貴金屬價格雖然急升，但係金礦股卻升唔起，噚日3大金礦股紫金（2899）、招金（1818）以及靈寶（3330）股價都要跌，相反其他另類金屬礦股卻相當之有勢，例如江西銅（358）收8.89元，升4%，東方有色（230）收0.78元，升2.6%，中國稀土（769）收1.75元，升6.7%，亞洲鋯業（395）收0.99元，升3.1%。
亞鋯嘅鋯（Zirconium）屬高耐熱及抗蝕的金屬元素，可用於手機元件、壓電陶瓷、人造寶石、化妝品、光學玻璃、光纖及電池等，用途甚廣，另外鋯化學物也是核電廠的建材之一，鋯合金則用於製造核燃料棒包殼。

稀土有留意價值

至於中國稀土，所生產嘅就更加名副其實係稀有金屬化合物，唔少礦都係中國特有，至於用途則廣泛應用於電腦屏幕、電池、光纖通訊及鋼鐵、冶金等工業，而中國積極推動節能，慳電膽所用到嘅材料，就係由中國稀土供應，也因此外資巨頭如美國通用，都要搵呢間公司簽獨家供貨合約。
雖然稀土價值珍貴，但係由於礦源分散，過往無管制之下民間小型礦商濫掘濫採，搞到價格升唔起。
之不過去年4月開始中國不再發出稀土開礦牌，無牌商則被取締，令去年稀土產品價格升咗1成至3成不等。
稀土升勢初起，短期仲係有留意價值。