歐央行總裁德拉吉上周四話，喺下次亦即3月份議息會議上，可能有必要檢視及重新考慮歐央行嘅貨幣政策，語畢全球股市即彈。
事實證明，金融海嘯之後，環球經濟齊齊要以寬鬆幣策吊命，減息、負利率、量寬……而且隨着時間過去，劑量要越加越大先夠用，有如吸毒般上癮。所以德拉吉上周暗示會再加大寬鬆力度，環球股市即時興奮返晒。
不過大家對於德拉吉都係唔好抱太大期望，德拉吉影響力的確唔細，曾經成功喺2012年遏止歐債危機發酵，不過同美國聯儲局主席耶倫比較，推動環球經濟同支持資產市場嘅影響力都仲有啲分別。
德拉吉可以點樣拯救地球？歐央行可以再減息、再加大買債力度，可惜過去經驗證明，歐央行買債從來唔及美國手鬆，如果對歐央行買債可以釋放嘅流動性抱太大期望，最終只會失望。