民主黨鄺俊宇喺超區攞到逾49萬票，吸票驚人，33歲就成為議會票王。鄺俊宇叫得鄺神肯定有神人之技，而佢唔只識也文，亦識也武……跳舞至真。網民噚日重貼昔日舞照贈興，霎時又瘋傳；八方叫佢再獻技，佢一度怕醜話唔好，但群情洶湧下，噚晚喺旺角謝票時即場示範幾個招牌動作，幾秒鐘可見，技能似乎無生疏！

跳舞為同年輕人溝通

鄺神噚日喺fb留言，話收到好多朋友短訊，「請我跳舞謝票」，奇怪點解大家咁有興趣？至此先知，大家發現咗一段佢9年前嘅跳舞片段，估唔到好多人關注。
鄺神喺fb話喎，感謝各位對佢嘅支持同打氣，透露自己人生嘅第一份工，工作地點就係自小長大嘅屋邨青少年中心，當時佢要同一啲年輕朋友溝通，「舞蹈是最好的語言（一跳舞就能開話題，不錯~）」，仲貼出當年單手撐地嘅相，慰藉粉絲。
而咁多年之後，人大咗、形象又改咗，𠵱家文青兼票王，似乎不宜再咁活躍。佢喺fb留言，「今天已立即開始工作了，希望保持像舞蹈的活力，投放在這個自小長大的香港，加油:)」，而最尾一句先係重點：「P.S.這樣當找數吧-_-」。
唔知係咪撐鄺神嘅選民唔收貨，所以鄺神噚日旺角街頭謝票，索性喺fb直播，平息一吓民情啩！

李八方
MAILTO:[email protected]