都話股市變化冇咁簡單,「跌市大成交」可能係「散水格」,但唔係一定係散水格,呢個只係其中一個可能性,話咁快港股又升番上嚟,成交仲有706.5億元,承接力一啲都唔弱,雖比前日成交少咗,但係下試支持位反彈嘅第一日,通常都係咁。
如果大家同意好友一路都掌握大局,咁樣昨日恒指嘅技術走勢就有啲「假」,前晚美股唔算曳,但港股昨日一開市就「嘜」落19890,跟住就下試10日線,好快又炒番上嚟,成個圖變得好靚,似好友「造圖」多過淡友攻堅。
個市尾段掃得好勁,啲股票唔係「錘頭」就係「破腳穿頭」,起碼都會有個「陀螺」或「十字星」,下個禮拜一應該係淡友捱打嘅時刻。
國內啲銀行股呢兩日跌得好急,但係喺大升市升銳退速係好自然嘅事,前日大幅下跌加埋昨日早段嘅跌幅,調整嘅幅度好深,開展反彈起碼會逼近前日嘅高位,破埋位又會有另一輪狂升。