馮仁昭日前喺將軍澳撞到施念慈，原來佢換咗架新跑車，施念慈本身揸開Benz跑，但噚日就見佢揸住架保時捷911，呢款車嘅新車價約一百二十萬，二手價都要七十至九十萬，絕對係貴嘢。馮仁昭問施念慈架車係咪老公陳鴻業（Alan）送？佢話：「呢架車買咗成個禮拜，因為我同老公都幾鍾意，而且紫色係我嘅幸運顏色，所以佢咪話買囉。」

「我好錫老婆」
早前有傳話施念慈同老公結咗婚之後成日嗌交，但睇落Alan對佢咁好，唔似有乜問題吖，馮仁昭跟住打咗個電話同Alan傾咗兩句，Alan承認同施念慈間中都會嗌下交，但佢覺得呢啲嘢好正常，兩公婆嗌完交重會增進感情，Alan笑住咁話：「我不知幾錫老婆，𠵱家對佢重好過拍拖嗰陣！」

雪妮老公嫌Twins眼冤
咪睇雪妮同唐佳兩公婆年紀有番咁上吓，其實佢哋好追得上潮流，好似SiSi、EO2呢啲新人，佢哋都認得。不過，講到人氣組合Twins，唐佳就有啲不滿，佢話：「佢哋係幾得意，但打開報紙日又『穿屎』（Twins）夜又『穿屎』，真係睇都睇到厭、睇到𤷪，所以𠵱家見親佢哋啲新聞我都唔會睇落去。」

樊少皇返無綫唔習慣
樊少皇離開無綫成五年，最近佢返無綫同楊思琦、江華拍《繾綣仙凡間》。雖然樊少皇開咗工都有一段時間，但早幾日馮仁昭喺電視城撞見佢，佢竟然話重有少少唔習慣喎。馮仁昭覺得佢可能太過怕醜，唔多主動同其他藝人傾偈，先至搞成咁嘅啫。

孫燕姿接受男友禿頭
孫燕姿日前喺台灣接受咗曾志偉個女曾寶儀嘅訪問，公開咗佢自己嘅理想男友條件，就係要幽默、唔多說話、工作能力強同埋最好唔好禿頭，而且一定要係中國人，重要令到佢有愛嘅感覺。孫燕姿重話自己已經兩年冇拍拖，屋企人同朋友都好心急，如果緣份到嘅話，自己真係鍾意咗個禿頭男人，都會接受喎。

張學友返鄉下演唱
張學友下個星期六會喺天津開演唱會，今次係學友第一次去天津演出，但對佢嚟講就意義重大，因為佢係天津人，𠵱家重有唔少親戚都住喺天津，學友今次都會邀請啲親戚朋友去睇佢嘅演唱會，所以佢好期待呢個演唱會。

蘇志威舉家遊大馬
蘇志威同老婆劉小慧，日前帶囡囡去馬來西亞旅行，一家三口噚日好開心咁喺大馬返嚟，佢哋啱啱充完電，所以都好精神。記者問佢哋去旅行好唔好玩？蘇志威話：「都玩得好開心。」佢哋同記者傾完偈之後，就快步離開。

盧慶輝皈依變平和
盧慶輝前晚去咗會展「佛誕慈光耀萬家」祈福活動，盧慶輝更着上袈裟誦經，原來盧慶輝喺九六年已皈依，佢話：「當時我契媽帶我去台灣嚴靈山寺皈依，法號智耀。」盧慶輝話信佛後心情比前平和，但最重要係自己肯靜身修心。

黃品源潛水不適入院
黃品源早前為工作專程到台灣東部花蓮嘅石梯坪，作晚間潛水搵罕有嘅珠蝦，佢喺十米深水底突然覺得潛水衣有問題，但趕唔切做減壓動作就浮咗上水面。佢第二日要趕返台北，之後又飛去台東繼續做嘢，佢因為身體受唔住氣壓轉變，所以一落飛機就四肢癱軟，被急送入醫院，𠵱家重要定期到醫院做高壓艙、紅外線等物理治療。