【空中迴蹴】Stephy為《空手道》學「超必」 杜汶澤:唔要命咁攞對方命
杜汶澤stephy鄧麗欣空手道倉田保昭空中迴蹴
杜汶澤自導自演、鄧麗欣(Stephy)主演嘅電影《空手道》喺後日(11月2日)上映。Stephy之前話今次為部戲早半年就做準備,同之前拍開開工前一星期先睇稿做事前功夫好唔同。原來個半年前Stephy開始去日本空手道宗師、資深演員倉田保昭間嘅道場學藝,仲加埋歐錦棠幫佢做地獄式訓練。喺訓練片段見到Stephy打起嚟有板有眼,特別係個招空中迴蹴(Do Mawashi Geri),非常有殺傷力。
Stephy話好在本身有排球底,所以體能上會比較容易應付,佢話:「體能完全冇問題,同埋打排球都會經常摔落地,所以練成唔怕痛。反而最辛苦係練空手道基本功,因為日本人好仔細,加上我從來冇接觸過呢項運動,每個動作一分一毫都要好執著,所以練基本功時都曾經令我好想放棄,但劇組不斷鼓勵我,加上本來的運動細胞,所以之後學習得好順利,亦都漸漸喜歡上空手道。」
講到個招空中迴蹴,Stephy話收到劇本個一刻就知道要練,呢招嘅精要係要將好多基本技術同拳腳結合,加上唔怕痛,先可以練成,前後都花咗好多時間,佢話:「其實真正學習呢一腳,大概只係花咗一、兩堂,反而準備功夫、資料收集同心理上的調整花咗最多時間。」Stephy仲講仲笑話跟師傅學完之後,足夠防狼有餘,佢話:「我覺得自己身手好好,基本嘅防狼應該係冇問題。因為當時我也都請教咗師兄一啲簡單嘅防狼術。」Stephy仲話如果隻「狼」唔係高手嘅話,絕對可以駕馭到。
另外,講到呢招空中迴蹴呢招嘅犀利之處,已經係黑帶初段嘅杜汶澤解釋:「屬於我哋空手道嘅必殺技嘅一種,即係有去無回,唔要命咁攞對方命囉。有啲似二戰時啲神風特攻隊咁。」
更多娛聞,喺晒《娛果》
http://fb.com/appledailyent