宣萱今日喺旺角出席一個醫學活動，推廣免疫治療醫治癌症，宣萱嘅舅父同小學同學先後因癌病離世，佢希望以知名度宣揚訊息幫助更多人。宣萱由30歲開始半年至一年會做一次body check同婦科檢查，雖然明白到病發未必會即時發現，但好過乜都唔做，始終及早發現治病機會率愈高。

由於宣萱主演劇集《使徒行者2》已率先劇透，宣萱自己都捧場追劇，不過佢唔肯透露劇情，只話:「自己拍時冇睇到人哋條線，覺得咁樣拍會真實啲，噚晚睇劇情都覺得好慘好慘，睇Benz雄（許紹雄）睇到喊，個個人物角色都好悲慘，做臥底都係，所以我一世都要做自己。」頭幾集幾乎集集都有角色死，劇情好悲，宣萱到底會唔會出事呢？佢當然又賣關子啦。

由於套劇已喺大陸搶先播映，宣萱收到唔少粉絲劇透，佢劇透形容自己喺劇中係最悲慘人物同角色，但自己就幾鍾意呢個人物，同以往有異，仲話：「學陳豪話齋次次做好人都悶啦，今次演員全部都要大家估。」宣萱叫大家繼續睇，估下佢係咪臥底同有咩下場。