今日《街市遊樂團》原班人馬到大埔大元街街市出席惜食堂活動，江美儀同「下把位」嘅陳浚霆攬頭攬頸扮friend，陳浚霆舖晒下台階俾美儀姨姨，仲話咩「打者愛也」，over晒…

再問美儀姨姨，呢排佢好多是非喎？佢話：「我冇唔開心，對我嚟講都係一件好事，總之是非一次過嚟就一次過解決晒佢啦。唉，出得嚟行就預咗要還㗎啦。」有指江美儀仲爭舞台劇中介嘅錢，佢回應話：「行到水窮處，坐看雲起時，都係一場誤會，好耐之前搞掂咗㗎喇，不過報道出嚟後都有聯絡對方，都係一啲誤會嚟啫。」而中介人前日回覆《蘋果》亦稱已過數。

至於網民對佢嘅批評，美儀姨姨竟然爆咗句:「細路女唔識世界，你當我，我冇唔開心，總而言之所有問題已經解決晒，陳浚霆依家係我嘅契爺，佢係我爹哋，希望啲網民可以輕手啲。」

另外，仲有指江美儀9月時去上海演舞台劇《我和春天有個約會》時，透過劇組book酒店，不過酒店費用遲咗找數？佢表示：「都搞掂晒喇。」

面對傳媒詢問時江美儀冇顯得唔耐煩，佢話：「冤枉呀大老爺，如果再係咁連我都搞掂埋㗎喇。不過都好嘅，我可能有時會令人有誤會，所以有啲問題一次過嚟都好嘅，自己就可以一次過解決晒，解決晒之後我就冇再爭人任何嘢喇。」