港股直通車最快本周三可以落實第一宗國內散戶來港買貨交易，成為中資股熱炒理由，相信此概念短期內仲有得炒。現時市場幾乎一面倒熱炒AH折讓大嘅股份，而不少評論認為內地人對港股認識貧乏，只識有A股嘅H股，其實意見相當偏頗。有此論調的人不妨去參觀一下國內證券行，國內股民研究股票的認真程度肯定大過港人多多聲，而國內財經傳媒已經出現百花齊放的現象，介紹港股嘅媒體亦唔少。
炒到呢個時候，與其再去炒AH折讓，倒不如揀一啲仍未起動嘅紅籌股短炒。北京發展（154）是其中一隻北京奧運概念股，主營北京一卡通業務，該公司今年先將酒樓業務「北發阿一」出售，繼而又減持衝浪平台（8178）股權，似乎是有心集中資源搞好一卡通業務。
事實上，一卡通發展潛力驚人，管理層較早前接受訪問時表示，一卡通去年5月正式在北京啓用，於今年3月底，已突破1000萬張，至6月時再增至1150萬張，對比八達通在港推出多年，至今發卡量才逾1000萬張，增長速度相當驚人。集團今年已開始拓展一卡通的其他商業用途，包括便利店、超市及快餐店等，日後分賬收入更可觀。
北展6月中開始整固，上周大市升到飛起都無反應，一收齊貨料可強力爆上。

另一類可以收集嘅係有意轉板嘅創板H股，參考鄭州燃氣（3928）同山東墨龍（568）兩隻H股上主板後表現都不俗，可以留意兩隻已提交轉板申請嘅創板H股天業節水（8280）及京客隆（8245），此兩股都在近期橫行，但數短線爆發力，應以天業節水短炒動力較強。