早前加盟西甲豪門皇家馬德里嘅比利時球星夏薩特，周四去到皇馬主場巴拿比奴舉行加盟儀式，結果有成五萬名球迷入場一齊歡迎佢，場面十分墟冚。

夏薩特喺巴拿比奴一眾球迷面前係咁擺甫士畀攝影師影相，舉手投足都好有星味，佢亦相當識做，喺場上錫錫波衫上面嘅皇馬隊徽，一班球迷都好受落。對於自己終於加盟皇馬，夏薩特好謙虛咁話自己好希望可以喺呢間歷史悠久嘅球會度證明自己：「雖然以前我有一定嘅成就，但嚟到皇馬一切都要由零開始。踢波係永遠都可以進步嘅事，你永遠唔會到達極限，我目前處於球員生涯嘅黃金時期，但呢支球隊可以再次提高我嘅水平。」

被問到加盟皇馬係咪想幫佢贏到金球獎嗰陣，夏薩特就話：「我嘅目標只係幫球隊贏波，如果一切都順利嘅話，咁點解唔可以贏金球獎？我會有咁嘅諗法，但唔會日日都只係咁諗，始終最重要都是幫皇馬贏獎盃。」夏神嘅球衣號碼仲未公佈，有傳佢將會着7號！