韓國《MAMA音樂頒獎禮》聽晚就係香港亞博館舉行，今年出席嘅韓星陣容強勁，呢兩日佢哋都陸續殺到香港，好似噚晚BIGBANG嘅G-DRAGON(GD)同太陽就率先嚟港，佢哋先會出席今日舉行嘅YG同騰訊簽約活動，之後聽日就會出席《MAMA》。

噚日GD同太陽係韓國出發時，GD被拍到佢個超大黑眼圈頹廢LOOK，唔知佢係唔係驚嚇壞粉絲，所以噚晚原定10:30抵港嘅GD同太陽，因為航班延遲關係，最後搞到成凌晨12點先出閘，GD亦趁機執返正個樣，不過就只係戴咗頂巨型帽遮住個倦容。

雖然噚日香港天氣轉冷，又下起毛毛細雨，但都無損粉絲嘅熱情，噚日都有成30名粉絲係現場等待，當GD同太陽出閘時，班粉絲都有狂叫偶像，但兩人都未有停下同粉絲打招呼，全程眼眉都冇望過粉絲，太陽上到車後仲全程玩手機，真係難為咗等咗咁耐嘅粉絲，不過《MAMA》大會就安排咗一個戴上頭盔嘅人歡迎GD同太陽，GD見佢造型咁趣怪，即時都展露笑容。

而今日亦都陸續有一大班韓國來到香港，好似係香港、內地都好受歡迎嘅EXO、IU、GirlsDay、SISTAR、Ailee、李鍾赫等都已經嚟咗香港，為《MAMA》做好準備。