ViuTV將於4月進行大革新，今日於尖沙咀一間酒店舉行「全新節目編排」發佈會，但嘉賓陣容似乎唔係好夠照，最勁有林雪、廖碧兒，仲有艾粒、KB、倪晨曦、杜小喬等。活動上公佈，由4月3日起，黃金時段有全新節目編排，周一至周五，8點半播外購劇，9點半播本地製作劇集，10點正播實況娛樂，11點半播《晚吹》系列，12點播出新聞報導。

對於去年ViuTV勁蝕1.83億，製作部副總裁金廣誠話﹕「業績唔可以用一般去討論，要做好本份，俾多啲選擇觀眾，開頭投資咗好多，一步一步，我哋繼續向前走，好似今年繼續製作好多劇集及節目，否則李生(李澤楷)唔會叫我哋繼續開拍，今年起碼有15部劇集，人手加咗，又要租廠，都未有真正數字。公司有信心嘅，會繼續投放更多資源，做好節目回報俾觀眾。」金廣城透露ViuTV去年共製作39個，合共350小時嘅實況娛樂目，而Talk Show則製作超過150小時。

問到係咪5月奇妙電視開台，所以要加快腳步？金廣城話﹕「唔係，4月一周年，BB一歲都要有啲改變，向好方面發展，今年多咗本地劇集。(蝕錢變陣？)唔係，公司一個投放期啫，嚟緊多計劃。(但今日嘉賓好似較遜色？)邵仲衡要趕劇，今日呢班藝人出完活動都要開工，我哋存貨不足。(會否邀請強勁外援？)要睇劇本，啱人啱角色，唔會理係奇妙或前TVB藝人，啱都會用，我哋今年最少製作15個劇集，現在收到約10個劇本，如行外人有劇本都會考慮，想有唔同種類，貼近番觀眾。」