美國剛公布嘅褐皮書話通脹受控、經濟好，但係個別嘅地區，就同呢個大形勢有出入，投資者當好消息炒，就算貿赤創新高都當佢冇到，美股前晚就係咁樣大升特升。
股市係充滿夢想嘅地方，既然個個都希望道指破12000炒上（前晚報收11947），咁樣就要將每樣嘢都睇成好美麗，夢境未幻滅前，千祈唔好以為可以叫醒發夢嘅人，因為係唔會有效嘅，同時又唔好扮醒目，以為「眾人皆醉我獨醒」，心口掛個勇字去造淡，面對咁嘅市，一係唔玩，一係陪佢哋癲，只要設定離市策略同嚴格執行就可以嘞。
港股昨日逼近18000收市，後市仍會向上試關，繼續吼實啲主要成份股嘅C輪。

中移動C輪3496：中移動（941）過去兩個月習慣咗升完一輪便調整下試10日線，跟住又升番上嚟，唔覺唔覺已經升咗好多，昨日報收58.25元，港股其間亦升咗唔少，中移動嘅功勞好大。
上次推介隻中移動C輪3496嘅時候，個價係29.5仙，昨日已經企喺39仙收市，更一度升上42仙。昨日正股大成交推上，「倒轉錘」收市，下個周初應該會試60元，破位睇63元。3496仲有137日期，槓桿率14.9倍（有效7.5倍），引伸波幅30.6%，對沖值0.5，正股升上60元，3496應該見47仙，正股升上63元，隻C輪應該會上到65仙，現價買，正股跌穿57元止蝕。
俊樺