神劇《太陽的後裔》男星宋仲基今日第三度來港，為聽晚喺亞洲國際博覽館Arena舉行嘅粉絲見面會做準備，今早佢就踢住拖飛嚟香港，不過航班就稍為延遲，直到約下午2時10分宋仲基終於出現。

雖然宋仲基遲咗成個鐘先到達，但無損一班粉絲嘅熱情，至中午時份，喺VIP通道已有成過百粉絲聚集迎接Oppa，佢哋大部份手持黃色太陽花，亦有穿着迷彩衫，打扮如軍人嘅粉絲，亦都有人掛上橫額、唔少穿上校服嘅學生亦都有到場等候。

現場有4架7人車做準備，同時有一架Benz房車及20個保安維持秩序。宋仲基一出現同韓國來嘅打扮一樣，佢見到粉絲都即刻有鞠躬同粉絲勁揮手，大冧粉絲。當宋仲基上咗車之後，佢即較低車窗同粉絲揮手打招呼，認真親民。而宋仲基Oppa只係現身僅僅28秒，但粉絲得到Oppa揮手回應，已經勁開心。

據粉絲透露，現場粉絲準備嘅太陽花係佢哋自掏腰包購買，當中佢哋購買咗足足有400花朵，派畀現場粉絲嚟迎接Oppa。