家陣啲小朋友細細個就識用電腦上網,喺油蔴地天主教小學(海泓道)讀緊小六嘅陳穎汶就重犀利,小小年紀,已經唔買聖誕卡,改為用Flash整動畫賀卡送畀親朋戚友,認真環保。佢重整咗個網頁介紹大熊貓,話要畀多啲人認識呢種瀕危動物咁話喎。唔止呀,佢一年前已經開始喺社區中心做義工,教其他小朋友上網。結果,佢喺千七個小學生當中脫穎而出,奪得電腦教育學會舉辦嘅資訊科技挑戰獎勵計劃「最優秀金章學生」冠軍。
科大校長朱經武係今次頒獎禮嘅主禮嘉賓,佢話自己細個嗰陣冇機打,淨係可以打麻雀,重要係用碼子射、識飛嗰隻。佢見到𠵱家啲小朋友唔用彈弓用滑鼠,覺得好開心,希望佢哋自細培養用電腦嘅技能,第日做IT人就有前途。但係一講到校長自己嘅前途,佢就守口如瓶,對於續約問題乜都唔肯講。
傳真︰2623-9278
電郵︰
[email protected]