【約旦直擊】賽後泛淚抱歉令港人失望 星如不言棄誓打好名次賽
蘋果日報 2020/03/10 02:35
曹星如拳擊約旦直擊OLYMPICS奧運拳擊亞大區資格賽
面對世界冠軍米薩夏利諾夫猛虎出柙的攻勢，曹星如（Rex）多次試圖反擊，最後惜力戰而敗，賽後他眼泛淚光，連番抱歉令香港人失望。Rex指對手出拳密度極高，如同波浪般湧至，打亂其比賽節奏，冀盡快收拾心情，迎接香港時間周三晚舉行的名次賽。
「神奇小子」曹星如與奧運資格失諸交臂，他賽後坦言對手實力強橫，速度和出拳密度尤其優勝，未能如上仗般控制距離反擊，「我第二回合想避開佢拳再還擊，但反擊密度不及對手，佢每次出組合拳都六拳以上，密度壓住咗我，我好難去做還擊。力量我都承受到，但密度太高，好多時變咗浪咁冚埋嚟。」他續指拳速很快，限制其移動幅度，難以發揮賽前部署。12年前Rex初戰奧運資格賽，首輪黯然出局，今次登上擂台雖然再嚐敗績，但他表示感覺實在得多，「今次係實在好多，知自己有足夠體能頂晒，12年前第二回合中段已無力，但今次係有進步。」
今仗賽事舉行時間乃香港深夜，一眾支持者連夜透過螢光幕觀看Rex比賽，他賽後感謝港人支持，並多次表歉意，「好對唔住大家，令你哋失望喇，但唔可以放棄住！我會盡力打埋（名次賽）！」戰罷八強，Rex緊接翌日（香港時間周三晚）要出戰名次賽，他認為今仗過程反映他抗打能力十足，但臨場要加倍提醒自己提高出拳密度應戰，由於連續兩日作賽，他指賽後首要任務為減磅，「16強打完有一日畀我減磅，但今次緊迫啲，而家一打完就要返去減喇。」
依大會早前公佈的賽程，曹星如所屬量級的名次賽定於香港時間周二深夜舉行，然而大會周一晚賽後公佈周二最新賽程，其上卻不見曹星如一仗，港隊上下亦一頭霧水，估計此役將延至周三晚舉行。
記者：洪量丰
攝影：王子俊
攝影：王子俊
賽後曹星如表示令港人失望感到抱歉，但會盡力打好名次賽。