當年今日
關於我們

【可能係最好睇嘅台慶劇】《降魔的》結局玩留伏筆 想開第二季?

蘋果日報 2017/11/26 23:20

馬國明降魔的降魔槍伏筆

大台嘅《降魔的》今晚就大咗結局喇,呢套劇一直以嚟都收到網民嘅愛戴,大家都讚呢套劇嘅劇情好好,有留伏線加埋唔少催淚位,到咗結局又點呢?
結局一開就嚟一個少少催淚位,就係劉佩玥死咗之後,同馬明講佢嘅人生原本係想點,但係依家死咗,所有夢想都完咗,兩個仲一邊講一邊留眼淚,不過對比起之前嘅催淚位,今集又弱咗少少嘅。仲有另一個催淚位,就係馬明同黃智雯兩個,黃智雯明明都已經記得馬明,但馬明就因為殺咗黃子恆,所以覺得自己係一個有罪嘅人,所以冇選擇同黃智雯一齊,少少催淚咁啦。
而去到最尾,今次就冇BBQ大團圓,只係講馬明真係做咗一個「降魔的士司機」,揸的士嘅同事又驅下鬼咁,最後就係馬明喺馬路中心,大叫胡鴻鈞個精靈名石敢當,希望可以見返佢,當馬明上返的士,又真係見到胡鴻鈞,但胡鴻鈞唔似係石敢當,造型唔同咗,仲同馬明講:「小馬,你唔認得我?」馬明就只係講咗句:「豪仔?」成套劇就完咗喇,咁呢個胡鴻鈞真係豪仔?其實就九成係嘅,因為石敢當係用「本尊」稱呼自己,而唔係用「我」,咁如果真係豪仔,咁佢又係人定係鬼呢?咁就睇下大台就唔會拍第二季喇。
不過無論點都好,《降魔的》又真係好受歡迎,甚至有網民話呢套係最好睇嘅台慶劇。
更多娛聞,喺晒《娛果》
http://fb.com/appledailyent