西港島線通車後，西營盤高街由一條寧靜街道變成「新蘇豪區」，食肆雲集，晚上非常熱鬧。華華有晚喺高街行逛，發現有個地舖全部落地玻璃，裏面有人跳街舞，非常有型，心諗排舞室通常設於較平租嘅工商廈，邊位咁落本租地舖，原來此人正是電影《狂舞派》嘅舞蹈總監麥秋成。

2013年上映嘅《狂舞派》爆紅，令更多人認識麥秋成與街舞，麥秋成早於2011年就投資六位數字喺觀塘工廈開設面積4,000方呎嘅舞室Neverland，月租3.5萬元，一年後已回本。之後佢打算喺港島區開舞室，就揀中高街地舖。
近月佢喺高街租落1,200方呎地舖開第二間舞室，月租5萬元。雖然地方細，月租貴，但可以吸引途人駐足欣賞或八卦，順便收宣傳之效。
呢度每晚6點至10點半先至有堂（日頭會將舞室出租），麥秋成話，跳舞學生當中，小朋友、學生與成人各佔三分一，好似採訪當晚，約有10人上堂，其中有3、4位就係放工去上堂嘅OL。
近年OL確係流行跳減肥舞，跟隨音樂跳舞燒脂，效果肯定好玩過普通做運動。麥秋成都話「有OL跳Fitness覺得跳到悶，搵我學街舞，仲跳到表演」如果針對OL開跳舞班，肯定可以賺到盤滿缽滿。
但佢認為，培訓本地舞蹈新人重要過搵錢，所以只係打開門口做生意，歡迎OL報名上堂，但冇專登大肆宣傳開OL班，「如果真係想搵錢，又用六位數字投資，不如開咖啡室或餐廳喇」。

咪以為跳街舞係年輕人嘅專利，幾十歲人都可以去跳，麥秋成𠵱家就有一位年過50嘅上市公司男主席跟緊佢學跳舞。
為保障客戶私隱，麥秋成點都唔肯透露呢位主席係邊位，只係話對方係已婚香港人。呢位跳舞主席已經跟麥秋成學舞一年有多，米高積遜嘅招牌舞步Moonwalk都識得跳，上堂嗰陣，呢位主席仲會戴住頂小黑帽，入型入格。
麥秋成讚呢位主席嘅表現好過一般初學者，相信同佢平日做開運動，手腳郁動比較靈活有關。而且佢好有恒心，如果唔使出差，一個禮拜會跳足3日舞，每次跳個半鐘，學舞嘅地方就喺主席屋企。
35歲嘅麥秋成入行跳舞都有14年，由時薪100大元嘅舞蹈員，做到𠵱家成為時薪過千元嘅排舞師。佢憶述，年輕時喺屋企睇錄影帶跟郭富城與米高積遜學跳舞，入行後3年，先有機會去美國洛杉磯深造舞藝。

李華華
mailto:[email protected]