莫凱謙於2005年2月以6歲之齡，參加《殘酷一叮》第一季，憑一把沙聲唱腔，加自信獨特嘅台風喺節目專唱情歌一夜成名，眨吓眼佢就長大，近日仲想加入娛樂圈兼出新歌。

《蘋果》問過當年節目主持之一嘅克勤，佢回覆：「我記得嗰位謙謙，咁多年前，我聽佢唱，當然佢有一定嘅天份同音樂感，佢雖然年紀輕輕，但拍子同音準各樣嘢都非常ok，經過咗咁多年，我相信佢技術一定有提升。」

克勤認為娛圈係講天時地利人和，以及觀眾緣，佢續言：「希望樂壇有多啲新力軍，祝佢樣樣嘢都好運，同埋一切順利，話唔定將來有一啲機會，有啲節目，我哋再一次可以一齊合作。」