【新增動新聞】
做職業足球員嘅另一半，唔係個個都咁風光。朗尼老婆高蓮慘被另一半背叛，不過如果真係如報道所講要求離婚，分走朗尼六七千萬鎊身家，都夠好好過下半世。之不過一啲冇咁出名足球員嘅女伴，要衣食無憂可能都係靠自己好啲。

效力意大利丁組聯賽球隊拉蒂納的馬高佐敦（Marko Jordan），佢女友安祖娜（Angela Ladenko）就深明此道，知道男友靠踢波搵唔到幾多，實行苦心經營自己個社交網站，經常上載一啲自己嘅性感相，慢慢咁吸引越嚟越多人關注，話咁快依家已經有超過12萬名粉絲。而佢亦吸引到一啲服裝品牌贊助，佢再將著住贊助商嘅靚衫或者比堅尼嘅相放上網，間唔中再推介下某啲商品，好似胸墊咁，靠咁樣去賺錢。安祖娜搵到錢之後，又投資喺自己身體度，去咗做隆胸手術，務求令自己更加吸引。