玩具大王蔡志明兒子蔡加讚（Karson）今日喺九龍灣出席香港品格日啟動禮，Karson仲代表爸爸上台交贈200萬元嘅捐款支票。

Karson同汪圓圓育有3個小朋友，兩公婆都認為品格培育係最緊要，Karson話：「細細個就要佢哋起身執床，會教佢哋有禮貌，幫助人，希望可以教好佢哋。有時佢哋好忟發脾氣，我會俾佢發咗先，但如果好開心都突然發脾氣就唔得，唔可以吹毛求疵。」問佢哋邊個比較嚴格？Karson就話同太太同一陣線，萬一兩公婆有意見分歧，就係慢慢傾去解決。