三月三十一日本欄講會計轉行，引來馬主A熱烈反應，立即打電話嚟：「左丁山你講正我嘅心聲，嗱，我係有牌會計師嚟㗎，如果我留在容永道會計師行（已與羅兵咸合併），點都會做咗partner。但係好彩我及早轉行，十幾年前脫離會計師行，𠵱家先至可以呢度去，嗰度去，我太太係會計師，做大公司地區財務總監，飛嚟飛去，我見你嘅時間可能比見佢重多；我舅仔三十歲，係四大嘅經理級，做到𠵱家未有拖拍，外母唔知幾時可以抱孫！

馬主A訴苦水、揸住電話唔放，話做會計師賺錢冇時間享。卒之講完，收到《蘋果》送來讀者電郵，一位自稱小師妹嘅讀者話：
「小師妹我並非讀會計，不過曾經在Big4混過三年，見到做audit班男同事成日返大陸出差，其慘況如下：
—有人做到跟女友分手，皆因聚少離多，女友又成日擔心男友在大陸會去滾；
—已婚的會俾老婆哦，原因如上，香港女人面對國產南北佳麗的競爭，不免會擔心；
—有位同事因為返大陸出差太頻密，返到嚟發覺個仔（一歲左右）唔認得老豆；
—有位同事同我訴苦，話出差太頻密，無時間搵工同面試，想轉工都好難；
—試過有人在祖國偏遠城市做audit，俾國企大老闆叫入房，請他識做，否則大刑侍候」
呢啲慘況，左丁山未真係見過，只係經常見到胡定旭（醫管局主席、前安永亞太區主席）、張建東（行政會議成員、前畢馬威頭頭），方黃吉雯（羅兵咸中國部主管）等等威風八面，令人覺得會計師人工高，地位高，威到震，一時之間，諗唔到新入行核數人員的慘況。
另一位讀者Rebecca來電郵話：「本人日前於台灣花蓮參觀過柴魚博物館（ChihsingTanKatsuo），那裏清楚寫出柴魚其實是鰹魚，經蒸熟再以柴火燻乾而成，特告知。」多謝呢位讀者，現在似已有證據證實柴魚即鰹魚，其他讀者如有反證駁斥，請通知。