何雁詩同周志康今日喺屯門出席中秋活動，何雁詩男友鄭俊弘剛剛出碟，佢話已經買咗20隻以示支持：「我送咗畀啲姊妹、媽咪啲朋友，佢哋好鍾意。不過我自己都未有簽名（碟），最好寫埋嘢，寫晒成隻碟啦，我買20隻喎！」

何雁詩仲透露同男友去雙方屋企做節慶中秋：「媽咪叫佢幫手碌麵，點知太多親戚喺度唔記得咗，佢拎住個筲箕企咗喺度等我媽咪指令。」不過何雁詩表示雖然大家關係好穩定，但就有共識唔會咁快結婚，屋企人亦都冇催。

而周志康嘅哥哥周志文日前被拍得同緋聞女友劉佩玥去船P時疑似激咀，周志康為哥哥解畫，話只係角度問題：「嚟緊仲有一次，希望唔好有豬隊友。」但佢就強調哥哥同劉佩玥唔係拍拖，仲話自己原本都想游過去張浮床度，可惜影唔到。

精選娛聞，喺晒《娛果》
http://fb.com/appledailyent