女人對數字特別敏感，尤其三圍同磅數。現年41歲嘅韓君婷，97年參選亞姐，身形豐滿有肉地，三圍報稱36C 、26、39，更被改花名「籮霸」同「巨躉」，每次着短裙或泳衣，必成影「後」，臀部更是焦點。君婷身形、體重逐年膨脹，01年暴脹到150磅，周身豬腩肉。君婷翌年被纖體公司睇中，幫佢減肥修身，纖體前報稱腰圍29吋、坐圍40吋，大腿粗24吋，纖體後，體重成功減到109磅，腰圍25吋、坐圍35吋、大腿粗17吋，成績突出，重拾自信嘅佢立即大解放，換晒熱褲、迷你裙晒身材。

及至06年，君婷現身又嚇大家一跳，佢唔係翻脹，而係突變瘦骨嶙峋嘅「火柴人」，5呎7吋高嘅佢，體重跌到剩番80幾磅，有指佢當時受情傷，抑鬱兼厭食，身體差到脫髮同停經。

君婷身形暴肥暴瘦，上落極端，每次出嚟，身形必成話題，佢話：「大家成日圍繞問我肥瘦，我話你知，我最鍾意當年錢嘉樂叫我做『大躉尤加利』呀，日本妹，卡娃伊，我真係從冇嫌棄過以前啲肥相喎。」君婷仲邊講邊甜笑扮日本妹，佢強調過去咁多年從冇介意過肥瘦身形：「我冇討厭過自己身形，也唔介意肥，但當然都想擁有完美身型。」