特首選舉落幕，敗選嘅薯片叔叔風頭依然勁，周六晚去咗新光戲院睇曾志豪、陳嘉銘主演嘅《回帶廿年棟篤笑》，大讚兩人傾力演出，非常支持本地創作，「香港過去二十年的崢嶸歲月，笑中有淚，是非常豐富的創作素材。未來還會有更多環繞這主題的本地創作，為這廿年的精彩（采）故事留下註腳，我十分期待」，唔少人就讚佢越嚟越精神，「肥咗又容光煥發」，果然，選得好也未必好。

教小朋友要work smart

到噚日佢又出席2017亞洲劍擊錦標賽啟動禮，一到場已經有唔少市民要求合照。唔少人好想知，離開官場嘅薯片叔，會唔會轉跑道繼續從政？最近仲有風聲話，自由黨榮譽主席田北俊搵佢密密斟，「劍」指新東補選喎？之不過無論問啲乜，薯片都係一個答案：「我唔識答呢啲，今（噚）日只係講劍。」但佢都補充話，田少唔識打劍，亦都冇搵過佢教劍噃。
噚日活動仲有場「劍擊好友慈善賽」，為凝動香港體育基金籌款，呢個基金受助嘅小朋友問薯片叔，點先可以輕鬆打贏對手？薯片叔回應話，冇嘢係輕鬆嘅，凡事都要做好基本功，總之打劍有贏有輸，但每個機會都可以學到嘢。咁係咪要做到「好打得」兼「夠smart」？佢笑言：「Work hard 之外都要work smart。」

李八方