當年今日
關於我們

民建聯招牌減分 - 左丁山

蘋果日報 2003/11/27 00:00


惡佬明有唔少工程界?地盤界老友住響沙田駿景園,其中一位係工程K。工程K一家人喺七月一日曾經參加大遊行,當時已經決定十一月二十三日,一定到投票站投票。
駿景園位於駿馬選區,選民包括中文大學、赤泥坪、駿景園嘅居民。工程K兩夫婦去到投票站外面,睇清楚候選人名單,一個係前綫支持嘅羅雅芝,只得二十五歲,K太話:「年紀太細,我哋嘅姪女都大過佢啦,唔選。」其他兩個候選人,一個係蕭顯航,不知何許人也,係獨立人士;另一位係民建聯嘅何炳羲,工程K認識佢:「咦,何炳羲係中大MBA,做過中大校友會聯會會長,工程師,以前喺地鐵服務過,資歷好好啫,投佢一票。」K太立即唔高興:「做乜要投民建聯。」爭議一輪,K太投票畀一位佢唔識嘅蕭顯航,工程K投票畀工程師何炳羲,以示尊重同行。
投票結果揭曉嘞,工程K一睇,蕭顯航得八七七票,羅雅芝得七一一票,何炳羲得二一七票,工程K同老婆講:「真係民建聯呢塊招牌害人,最好資歷嘅工程師只得二百一十七票?重少過一位細路女,有冇搞錯呀!」佢老婆微微嘴笑:「人同此心,心同此理,前綫有號召力,可為小女孩爭取選票,但好多人似我咁,結果益咗嗰位獨立人士。」你話何炳羲唔埋堆,用獨立人士身份參選,可能重有希望,駿馬區乃係中產階級大本營,掛民建聯塊招牌肯定冇着數。