恒隆地產（101）主席陳啟宗（朗尼）一向牙擦，最近佢哋推售浪澄灣貨尾，引來一班南亞裔排隊黨同警察到場，搞到一鑊粥都好難認叻，朗尼惟有一改常態，一提浪澄灣就𠲖𠲖哦哦當答咗。反而無厘頭大讚左右手陳南祿前東家國泰航空（293）旗下港龍空姐服務好。
朗尼噚日出席一個經濟論壇，自爆早上由北京坐港龍航班回港，一望發現頭等艙只得六個人，得佢一個係香港人，其他全部係內地人。佢話即時好擔心班空姐，唔知搞唔搞得掂呢班腌尖嘅內地客喎。

無厘頭讚港龍空姐

好在港龍空姐最後𠱁得呢幾位頭等艙乘客幾開心，證明香港人服務態度係得嘅，佢講完仲即刻申報利益，話自己冇買港龍股票，完全係獨立意見咁話。華華相信朗尼冇港龍股票，不過唔知佢有冇國泰股票呢？
講空姐講到咁風騷，佢喺會後被問到浪澄灣推售，差啲被一班南亞裔排隊黨攻陷，搞到賣樓方法要由先到先得改為抽籤，佢就一路行一路低頭𠲖𠲖哦哦咗一句，咁就當答咗。
同場仲有久未露面嘅前行會成員兼著名地產分析師林奮強，佢話，旗下智庫組織「黃金五十」最近搞緊人口政策研究報告，佢比以前更加冇時間陪家人。問佢點睇樓市，佢就耍手擰頭，話冇睇樓市好耐，嗰種滄桑，直情拍得住經典電影《英雄本色》入面狄龍嗰句「我冇做大佬好耐」㖭。

李華華
mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange