韓國男星李東旭同《大話妹》拍檔李多海喺今年4月合作嘅劇集《HotelKing》雖然一度令劇迷期待，但劇集開播之後，《HotelKing》嘅收視就不如人意，由首播嘅11.7%跌到中段嘅8.3%，大結局淨係收得11.8%，令觀眾失望。

為咗翻身，李東旭未有休息就即刻接拍劇集《鋼鐵人》，同女星申世京合作。可惜《鋼鐵人》喺未開播時已不被睇好，有網友勁彈申世京係「收視毒藥」，亦有人話故事內容太誇張，令《鋼鐵人》首集只錄得6.6%。雖然劇中李東旭雖然落力騷肌谷劇，但收視有跌冇升，喺前晚播出嘅大結局更跌穿4%，只收得3.4%，創下開播以來一直收視包尾嘅記錄。

李東旭可能心灰意冷，噚日就通過Facebook留言決定收埋自己，停上拍攝。李東旭：「多謝大家一直收看《鋼鐵人》。今年真係好忙，剩低嘅11-12月我會進入休息期，請唔好搵我。」同時附上佢同女主角申世京以及一眾合作演員嘅合照，相中李東旭雖然笑得好開心，但仍然難掩對劇集低收視感到可惜嘅樣，而李東旭前日亦有出席劇集慶功宴。

相反，同《鋼鐵人》同檔嘅兩套新劇就成績理想，由女星張娜拉同男星申河均主演、喺上周開播嘅劇集《Mr.白》前晚播出一集就比上集升咗1.7%，收得13.3%成為同檔收視冠軍，劇組噚日亦公開咗一輯新劇照，而由男星李鍾碩同女星朴信惠主演、喺大前日首播嘅《Pinocchio》前晚播出一集就得9.8%，排第二。

另外，將接檔《鋼鐵人》、喺下周首播嘅新劇《王的面孔》噚日喺首爾舉行發佈會，一眾演員包括：徐仁國、申成祿都有出席。