政府今日下畫喺保皇派議員力撐下，終於喺財委會通過被泛民稱為大白象工程嘅391億啟德體育園撥款，事後主事嘅民政事務局局長劉江華、民政事務局常任秘書長馮程淑儀勁開心，同罕有「重返」立法會嘅前立法會議員、港協協暨奧委會主席霍震霆，仲有多名體育界代表握手。

會上頻頻為撥款解畫嘅馮程，被體育界代表問到嚟緊有無假放時，只苦笑話：「無呀，做埋下個禮拜先啦」。劉江華就讚馮程好勤力，話：「佢就（返工）24個鐘，我就12個鐘頭，哈哈哈！」馮程聽到劉江華咁講，都搞笑改口話嚟緊要攞病假抖抖，「真係要sick leave啊！工傷啊！」