破壞之王現身西灣河
周星馳茶餐廳鳩嗚乜乜乜破壞之王西灣河榮記冰室黎汶洛
【鳩嗚乜乜乜】
周星馳經典電影《破壞之王》中,主角何金銀着住印有「榮記冰室」餐牌嘅外套上擂台挑戰「大師兄」,萬料不到現實中真有其事。
網上最近流傳一張喺茶餐廳影嘅相片,圖中夥計嘅橙色制服,背面竟然印有「特餐牌」,寫埋餐肉通粉、牛肉餐包等等,連轉凍飲或多士加幾多錢亦詳列。網民大讚充滿創意之餘,亦有人懷疑老闆是否周星馳影迷。另外都有人講笑話,如果加價咪要換過晒啲衫?
有人話呢間係西灣河筲箕灣道老舖百利冰室,但間舖噚日係逢周四嘅休息日。(網友都話,乜香港仲有茶餐廳有休息日㗎?)
不過,費清搵到西灣河街坊、學民思潮嘅黎汶洛,佢話:「就係百利冰室囉,我成日去食㗎」。佢話好似真係最近發現侍應着住呢件衫,「幾得意吖,流動餐牌喎,明碼實價」。佢話間餐廳好有懷舊味道,夥計都好nice,「冇聽過佢哋唔鍾意着件衫喎」。