新華社今日發稿，原來佢哋早前同特首梁振英做專訪；CY由係咪放棄積極不干預政策、一帶一路點搞好、以致點樣解決住屋問題，包括係咪填海等都侃侃而談，齋聽仲以為發表緊連任政綱。

有政界花生友話呀，其實CY講啲乜，並唔係重點，反正都係hardsell，反而點解官方媒體新華社要同佢做專訪，猶如造勢咁，先至關鍵喎。大家冇理由唔記得，CY早前訪京聲言五度獲人大委員長張德江高度肯定，但新華社其後發稿報道卻隻字不提；其後新華社反而登咗財政司司長曾俊華嘅訪問，畀財爺大談如何配合國家發展一帶一路，即時又惹政圈關注，阿爺係咪唔押注挺CY連任、反而扒冷想谷鬍鬚曾？但呢次新華社咁做，令人奇怪：莫非阿爺又轉咗風向？

咁啱得咁橋喎，今日政圈開始有小道消息流傳，呢個新華社CY專訪，係特首辦或CY主動賣大包，獻出政改後第一次，無非想借新華社個平台造勢。雖則空穴來風啫，八方對於呢啲消息都不盡信㗎，可能有人唔抵得CY咁巴閉啫。

唔知「白宮發言人」馮煒光會唔會放假都一展專長，喺facebook為政圈解謎？又或者，《港人講地》搵到權威消息人士「澄清」下，咁就最好嘞。