「既生瑜、何生亮。」千奇唔好誤會呀,唔係講緊晚晚套電視劇,而係注定要做悲情主角嘅馬來西亞羽毛球手李宗偉。佢嘅天敵唔係林峯,而係林丹!
隨住喺倫奧嘅男單決賽又一次輸畀「超級丹」,29歲嘅李宗偉經已喺連續兩屆奧運、2010年亞運、同埋舊年嘅世錦賽決賽,通通死喺林丹拍下。睇嚟會係最後一屆打奧運嘅李宗偉,輸波之後呆坐喺場中間,最終都忍唔住留下男兒淚:「我已經搏晒命去打,之前受傷搞到得番兩星期備戰奧運。5場比賽,場場都要食止痛藥嚟打。喺關鍵嘅時候一路領先,最後都要輸確實有啲難過,但命運係咁,我只有接受!」真係聽到都心酸!
李宗偉亦特別向所有馬來西亞fans致歉:「好對唔住,贏唔到金牌,我嘅發揮比起京奧同世錦賽嗰時更加好,但似乎我整定係企喺林丹旁邊。」