韓國賣座電影《與神同行》嘅男主角河正宇夥拍韓劇《我的大叔》男星李善均主演嘅新片《轟天暴隊》，已於大前日喺韓國上映，而香港亦落實於下月24號開畫。

《轟天暴隊》一開畫即揮低其他勁片登上票房冠軍，更連續三日都做票房一哥，截至噚晚，電影嘅累計觀影人次更突破50萬，河正宇及李善均都有拍認證照答謝觀眾嘅支持，兩人手持「50」字眼嘅氣球，又搞鬼地向粉絲鞠躬。

另外，河正宇近日忙於為新片宣傳並受訪，被問到明年話題新作《白頭山》有望與「國民初戀」秀智合作，秀智更飾演其老婆，河正宇笑言：「點解要搵秀智？我哋都冇對手戲」似乎都感到可惜，續指：「我嘅(電影)拍檔全部都係男人，《白頭山》係同李秉憲合作，下一齣作品《波士頓1947》就係帶兩個男人一齊去波士頓嘅故事，再下一部作品《綁架》又係搵男人嘅故事。真係好糟糕，拍完呢啲電影我都44歲(韓國年齡)。好心急，我都期待緊愛情。」十分搞笑。

精選韓流，喺晒《娛果》
http://fb.com/appledailyent